ƏRİŞTƏLİ & KÜFTƏCİKLİ QATIQLI ŞORBA

Soyuq günlərin dərmanı olacaq şorbaların vaxtı gəlib çatıb. İki ildir ki, şorbaları sadəcə Ramazanda paylaşıram. Amma bu il özümə söz verdim ki, ara-sıra sevdiyim şorbaları paylaşım ki, Ramazan ayına tam hazırlıq görülmüş olsun, eyni zamanda qışın soyuq axşamlarında özümüzü və sevdiklərimizi isidəcək şorba reseptlərimiz bol olsun. 

Bu türk mətbəxinin dadlı-duzlu reseptlərindən biri olan küftəcikli və əriştəli qatıqlı şorba mənim və ailəmizin sevdiklərindəndir. Düzdür, çox hallarda yayla hazırlayıram, çünki, o daha tez başa gəlir, amma daha vacib günlərdə, xüsusən qonaqlarım gələndə bu şorbaya menyuda tez-tez yer verirəm. Yayla ilə oxşar cəhətləri çoxdur, qatıq və üzərinin nanəsi-kəklikotusu eyni şəkildə hazırlanır. Fərqləri isə ondan ibarətdir ki, bundakı küftə, əriştə və noxud üçlüsünün yerinə yaylada sadəcə düyü istifadə olunur.

Əriştəli və küftəcikli qatıqlı şorba
Bu resept 6 nəfər üçün nəzərdə tutulmuşdur.

[wt-tip] Önəmli nüanslardan biri duzu ən axırda əlavə etmək və qatıqlı qarışımı tökdüyünüz an və ondan sonra tam qaynayana kimi qarışdırmaqdır. Bunlar olmasa qatığın çürümə ehtimalı ola bilər. [/wt-tip]

• 150 qr. qiymə (çox yağlı olmayan, mən mal əti istifadə edirəm, sevənlər qoyun ətindən də hazırlaya bilər)
• 1 kiçik soğan
• ½ st. quru noxud
• 1 st. əriştə (təxminən yarım stəkan undan hazırlanmış ev əriştəsi və ya ev üsulu hazır alınmış əriştə)
• 2 st. qatıq
• 4 st. su
• 2 x.q un
• 1 yumurtanın sarısı
• 4 x.q. kərə yağı
• 1½ x.q. quruldulmuş nanə
• 1 ç.q. qurudulmuş kəklikotu
• Zövqə görə duz,qara istiot və pul bibər

Hazırlanma qaydası:
1. Əvvəlcədən suya qoyduğunuz noxudu qaynamağa qoyun.
2. Soğanı xırda-xırda doğrayırıq və ya mətbəx prosessorunda xırdalayırıq. Daha sonra kərə yağında çox qızartmadan bişiririk.
3. Bişirdiyimiz soğanları, duzu və qara istiotu qiyməyə qatıb yaxşıca yoğururuq.
4. Daha sonra bir sm-lik xırda küftəciklər edirik. Şorbanı bişirəcəyiniz qaba 1 x.q. kərə yağı əlavə edib küftəcikləri yüngülvari qızardırıq.
5. Üzərinə 3 st. suyu və bişmiş noxudları əlavə edirik, vam xodda 10-15 dəq. bişiririk.
6. Başqa bir qabda qatığı, yumurtanın sarısını, unu və 1st. suyu qarışdırırıq.
7. Əriştəni qaynayan küftəcikli suyun üzərinə tökürük və dərhal sonra qatıqlı qarışımı yavaş-yavaş və digər əlimizlə də küftəcikli suyu qarışdıra-qarışdıra əlavə edirik. Şorba qaynayana qədər bulamağa davam edin.
8. Başqa bir kiçik tavaya 1 x.q. kərə yağını əlavə edib qazın üzərinə qoyun, içərisinə nanə, pul bibər və kəklikotunu əlavə edib çox az qovurun. Daha sonra bu qarışımı qazın üzərindəki şorbanın üzərinə əlavə edin və 2-3 dəqiqə qaynadın, sonra altını söndürüb içərisinə zövqə görə duz əlavə edin.

Əriştəli və küftəcikli qatıqlı şorbanız nuş olsun.